Hanuman Chalisa — हनुमान चालीसा

The Hanuman Chalisa is a forty-verse hymn to Lord Hanuman, composed in Awadhi by the 16th-century poet-saint Tulsidas, who also wrote the Ramcharitmanas. Its verses recount Hanuman's devotion to Lord Rama, his strength and humility, and his role as a protector against fear and misfortune. It is traditionally recited on Tuesdays and Saturdays, and is one of the most widely sung devotional texts in India. Both the original Devanagari text and an English transliteration are given below, verse by verse.

हनुमान चालीसा

1

हनुमान चालीसा - दोहा

श्रीगुरु चरन सरोज रज, निज मनु मुकुरु सुधारि ।

बरनउँ रघुबर बिमल जसु, जो दायकु फल चारि ।। १ ।।

 

बुद्धिहीन तनु जानिके, सुमिरौं पवन-कुमार ।

बल बुद्धि विद्या देहु मोहि, हरहु कलेस विकार ।। २ ।।
2

हनुमान चालीसा - चौपाई १–१०

जय हनुमान ज्ञान गुण सागर ।

जय कपीस तिहुँ लोक उजागर ।। १ ।।

 

राम दूत अतुलित बल धामा ।

अंजनि-पुत्र पवनसुत नामा ।। २ ।।

 

महावीर विक्रम बजरंगी ।

कुमति निवार सुमति के संगी ।। ३ ।।

 

कंचन वरन विराज सुवेसा ।

कानन कुण्डल कुञ्चित केसा ।। ४ ।।

 

हाथ बज्र औ ध्वजा विराजै ।

काँधे मूँज जनेऊ साजै ।। ५ ।।

 

शंकर सुवन केसरी नंदन ।

तेज प्रताप महा जग वंदन ।। ६ ।।

 

विद्यावान गुनी अति चातुर ।

राम काज करिबे को आतुर ।। ७ ।।

 

प्रभु चरित्र सुनिबे को रसिया ।

राम लखन सीता मन बसिया ।। ८ ।।

 

सूक्ष्म रूप धरि सियहिं दिखावा ।

विकट रूप धरि लंक जरावा ।। ९ ।।

 

भीम रूप धरि असुर सँहारे ।

रामचन्द्र के काज सँवारे ।। १० ।।
3

हनुमान चालीसा - चौपाई ११–२०

लाय सजीवन लखन जियाये ।

श्री रघुवीर हरषि उर लाये ।। ११ ।।

 

रघुपति कीन्ही बहुत बड़ाई ।

तुम मम प्रिय भरतहि सम भाई ।। १२ ।।

 

सहस बदन तुम्हरो जस गावैं ।

अस कहि श्रीपति कण्ठ लगावैं ।। १३ ।।

 

सनकादिक ब्रह्मादि मुनीसा ।

नारद सारद सहित अहीसा ।। १४ ।।

 

जम कुबेर दिगपाल जहाँ ते ।

कवि कोविद कहि सके कहाँ ते ।। १५ ।।

 

तुम उपकार सुग्रीवहिं कीन्हा ।

राम मिलाय राज पद दीन्हा ।। १६ ।।

 

तुम्हरो मन्त्र विभीषन माना ।

लंकेश्वर भए सब जग जाना ।। १७ ।।

 

जुग सहस्र जोजन पर भानू ।

लील्यो ताहि मधुर फल जानू ।। १८ ।।

 

प्रभु मुद्रिका मेलि मुख माहीं ।

जलधि लाँघि गये अचरज नाहीं ।। १९ ।।

 

दुर्गम काज जगत के जेते ।

सुगम अनुग्रह तुम्हरे तेते ।। २० ।।
4

हनुमान चालीसा - चौपाई २१–३०

राम दुआरे तुम रखवारे ।

होत न आज्ञा बिनु पैसारे ।। २१ ।।

 

सब सुख लहै तुम्हारी सरना ।

तुम रक्षक काहू को डरना ।। २२ ।।

 

आपन तेज सम्हारो आपै ।

तीनों लोक हाँक ते काँपै ।। २३ ।।

 

भूत पिशाच निकट नहिं आवै ।

महावीर जब नाम सुनावै ।। २४ ।।

 

नासै रोग हरै सब पीरा ।

जपत निरंतर हनुमत वीरा ।। २५ ।।

 

संकट से हनुमान छुड़ावै ।

मन क्रम वचन ध्यान जो लावै ।। २६ ।।

 

सब पर राम तपस्वी राजा ।

तिन के काज सकल तुम साजा ।। २७ ।।

 

और मनोरथ जो कोई लावै ।

सोई अमित जीवन फल पावै ।। २८ ।।

 

चारों जुग परताप तुम्हारा ।

है परसिद्ध जगत उजियारा ।। २९ ।।

 

साधु-संत के तुम रखवारे ।

असुर निकंदन राम दुलारे ।। ३० ।।
5

हनुमान चालीसा - चौपाई ३१–४०

अष्ट सिद्धि नौ निधि के दाता ।

अस वर दीन्ह जानकी माता ।। ३१ ।।

 

राम रसायन तुम्हरे पासा ।

सदा रहो रघुपति के दासा ।। ३२ ।।

 

तुम्हरे भजन राम को पावै ।

जनम-जनम के दुख बिसरावै ।। ३३ ।।

 

अंतकाल रघुबर पुर जाई ।

जहाँ जन्म हरि-भक्त कहाई ।। ३४ ।।

 

और देवता चित्त न धरई ।

हनुमत सेई सर्व सुख करई ।। ३५ ।।

 

संकट कटै मिटै सब पीरा ।

जो सुमिरै हनुमत बलबीरा ।। ३६ ।।

 

जय जय जय हनुमान गोसाईं ।

कृपा करहु गुरुदेव की नाईं ।। ३७ ।।

 

जो सत बार पाठ कर कोई ।

छूटहि बंदि महा सुख होई ।। ३८ ।।

 

जो यह पढ़ै हनुमान चालीसा ।

होय सिद्धि साखी गौरीसा ।। ३९ ।।

 

तुलसीदास सदा हरि चेरा ।

कीजै नाथ हृदय मँह डेरा ।। ४० ।।
6

हनुमान चालीसा - दोहा (समापन)

पवन तनय संकट हरन, मंगल मूरति रूप ।

राम लखन सीता सहित, हृदय बसहु सुर भूप ।।